回應一個可以叫做比你教過既學生

無論你係邊過都好，我首先想多謝你咁真同咁坦白。首先我十分欣賞你的敢言，好多人或者都睇到你睇的東西，好多人卻唔敢講出來。我唔係一個只是喜歡聽欣賞意見的人，所以我先用呢個Blog 去問一些人意見，你的意見絕對寶貴，你的意見絕對有用。

所以我想在此遂一回應：

1)成17000租一個半場都冇既,地方,仲要射唔到三分 (我有錢用3百幾,可以租一個全場indoor,慢慢射,仲可以練三分tim)

我曾經諗過一個人去訂一個場，但係當你一個人係一個全場裏面，那種感覺就會覺得好孤單，亦都好奇怪，那一種壓力會好大，根本無人會做。第二就係你要執波執，走來走去。在一個一千尺的地方，有一些器材幫你執波，還可以安排30個波，可以有錄影系統，你可以分析自己的動作，可以在訓練效率上提升很多，在我的練習場中你可以用半小時的時間等於在其它場練1小時的投籃。

3分的確係一個大問題，特別是對於希望打甲組的人來說。但對於兒童、青少年，3分就唔係咁緊要。問題是我要做的是那一個群體。若你是我教過的學生，你應是那種希望打甲組的人。但香港，我坦白講，一世都打唔到甲組的人是大多數。好似入到大學的是少數人一樣，但無論你入唔入到大學，起碼你都會想有得"補習"。我相信我做唔到某一些人，這個是我自知的。

其實運球、傳球、走籃、中鋒動作、突破、步法，搶籃板全部都可以在我的球場練。若覺得我的訓練場因為沒有投3分就唔來，(先不計收費)，只是選擇了只看一個盲點。但我絕對認同大部份人都會看這個盲點而不來。那也沒有辦法，我只有希望有一些人不會單看3分球技術的人來我這裏，我相信有許多人連2分都未射得好。

我的場地可以改善你的 shooting form ，改完後，你可以自己去訓練，我並無期望一個學生永遠跟我，我只希望他能夠學到一些重要的東西後，自己可以繼續自己去練。

我希望的是如果有一個學生進步左，他會成為我的一個生招牌，讓更多人來。

根據我自己的經驗，要練好一種技術，需要好專注，要做到完美動作，需要好多時間，最好每周練三次，每次2小時。跑一百米的運動為什麼要教練呢﹖相比較下，籃球有咁多動作，卻自己可以練好﹖原因是你到底想做到有多好吧。

要做到最好，就要講效率，不是人人有無限時間，如果你每星期只得一小時練波，有一些人要返工，但一去街場又係鬥波，根本練唔到技術，若要去訂康文署的場地，又要預早一個月訂場，而一個人練根本都無可能，所以香港許多人的技術唔進步，因為鬥波多過乜，而另一個有趣的發現是許多出色的甲組球員都是教書出身，因為他們有自己的場地可以不停咁練。

2)對象主力係小朋友,但係4百元咁貴有咩家長會肯比呢,你係有唯一既設施,你既教練經驗都多,但係你名氣小,d家長係buy名氣既!
你係球星,我用幾百元俾你教我小朋友打波有咩所謂姐,個小朋友鐘意咪得law

我完全同意，我一開始的時候應該係冇人會識，也未忽會有人願意來，所以我要守，我要努力教好每一個我有的學生。我也會考慮在初期提供優惠，收平一些，但我在廣告上寫出來的價錢是$400.- 是先測試巿場。我認為$400 並唔係貴，因為教琴都300 - 45分鐘，香港有錢人多的是，若他的兒子是喜歡打籃球，你又教到佢，我相信錢並不是最大問題。但對於一般巿民這絕對是難負擔的。

假如$400沒有人，我可以調整，幾多錢是一個巿場接受價，要看供和求，現時不能肯定。我可以一路減價到有人為止。最重要的是能用盡個地方。但我相信唔會掛﹖你唔好嚇我喎!

我的場地只有一個，我的時間亦有限，加上租金成本，我暫時不是太多選擇，但我唔排除我會用另一些方法去幫一些窮的籃球愛好者，但這是後話，因為我先要搞好我的主要客戶群。

3) d小朋友會唔鐘意玩你個場呢?一個人打波好玩,定係成班人好玩呢 ,你係唔係球星,d小朋友鐘唔鐘意你,buy唔buy你先

當然不會每個小朋友都會鐘意來我這裏，因為小朋友受地點限制，加上時間和學業壓力，我相信只會是很少部份在沙田區又十分喜歡打籃球的小朋友，還要家境很不錯才會考慮我的服務。我現時走的是專業路線，希望吸引的是那些校隊同學，那些在校隊中一直落後，又無法子進步的人。

全香港有1100間中小學，若每間中學有2隊校隊，每隊十二人，全港就有26,400人，當中有一半將會是大後備，可能當中會有小部份人會希望"補習"，但現時並沒有任何服務提供，雖然有一些教練可以幫他們，但他們可以在那裏教他們呢﹖在街場往往有很多人，要book 場又唔太可能，因為錢好貴，時間上亦無可能一個月前book ，所以我可能有巿場。 但這是我估計的，不是我肯定的。所以也要去 find out.

我的一位顧問告訴我他每年可以帶校隊來我的中心訓練一次，但就不能經常來。如果每間新界區的中小學都來我那裏一次，我諗都唔錯。

也不排除有一些人會選擇用買少一對波鞋或靚衫的錢，而來跟我學波，我相信這個人是我想教的，那些認為自己可以不用付出額外的便又可以追到別人的球員，我亦都幫唔到，其實呢種人神仙都幫唔到。

4)d家長buy唔buy你先,你有冇例子,你有冇教過一個頂尖既球員出黎?

如果今日有一個教練響哂自己個朶，話自己教到邊個邊個成為甲組球員，我相信呢個教練就已經唔係幾好，因為一個人的成功，係有好多方面的人的努力才會出現的，是Team work 是天份，是父母的教導所致。

你知道現在有許多搵食的網球教練嗎﹖我認得一位教練他有一份全職工作，放工及周六日教網球，但靠網球月入超過3萬。他也沒有教出什麼頂尖球員，全都是靠介紹的。他每小時收費是350.-

你又點睇﹖我俾埋個場你收400.- 都係好貴﹖教一個人喎! 我諗俾番那一班有子女學緊網球的家長睇，我諗佢地同你的諗法唔太一樣。

我 的目標是希望那個球員有進步，也透過籃球學懂要努力不懈，不要灰心，他打唔打到甲組並不重要。我倒希望那些家長這樣告訴我："C sir ，多謝你教好我個仔，佢最近d情緒好好多，又健康開朗左，已經唔會再係堂上面搞事，佢話打籃球好開心。"

一些實際例子是，我曾經有一些家長找我教他們的子女，他們根本知道自己的子女無可能打甲組，亦唔想子女沉迷籃球，不過子女開心，又健康的活動，他們就會支持。那時我去他們的私人會所教，收300/hr 。當然這些是少數，當時我沒有自己的場地，也沒有賣過廣告。 巿場上會不會仍然有這些人呢﹖這是我要 find out 的。

一句到尾，有一些東西是要試才能肯定的。

5)你個idea連3on3都打唔到,d人冇得鬥波,有咩好玩,如果我係小朋友,我應該最enjoy練波既時間,就係鬥波,even我而家係大朋友都係

首先我想你去睇一睇呢條片，呢個十歲的美國的小朋友一天練4小時，鬥波我諗冇十五分鐘。

我的場地可以打一對一，2對2。如果要鬥波，駛乜來我這裏﹖鬥波可以落街場嘛! 如果你約埋一些朋友來，大家鬥射波，1打1 ，然後即時在場內睇番自己鬥波時的 crossover 做成點，慢鏡遂格重播對手的必殺技，然後再諗埋點破佢，再鬥一場，或者同朋友飲杯野，突然想睇法1997年佐敦食錯野都拿40幾分羸爵士的那場經典比賽，我相信我個場都會係全香港惟一做得到。

我仲可以放2個框平排，2人同時鬥快射入100球，有埋計入球的機器，顯示在場內的計分牌，出面的場點做﹖

其實另一個巿場是，我這個地方可以帶給更多人相信我是一位認真的教練，我可以出外服務 (收$500 好嗎﹖)，不一定要在我的場地。這個場地可以為我產生一個效應，一個全港最"認真"教波的教練，對嗎﹖

6)籃球係團體運動,一個人既時間始終係小,最多都係練到射波,拍波阿,體能,咁都好既重要傳波呢,戰術呢,球場閱讀能力呢

對，但係點解宜家咁多人用全場一打一呢﹖Kobe 點解咁令人羨慕就係因為他的個人技術神乎技，如果冇個人技術，就一定唔駛合作。

如果你可以在我個場練到有 Kobe 十分一，我諗你都唔介意俾人話獨食，唔識傳波啦。

傳球我個場絕對練到，因為我會買一個器材，好似對牆傳球，練熟你的傳球，百傳百中。

戰術呢家嘢亦都係我個場可以做到，因為我可以利用錄影帶，俾全隊人睇明白，然後再落街場練。 -- 唔記得話你地知，我的私人籃球場的另一個地理優勢，就係它的對面 (行30秒)，就係一個新起的公園，裏面有一個全場。如果落雨就可以上來我的球場，或者教完戰術就落去練。

但坦白講，我唔打算做呢項服務住，因為我要搞好個人技術先。

7)你真係有生存空間咩?! 一個月$17000+ ($300000投資既三年回本=$8333.3)+自己份人工Set佢$10000=$35333.3 除返三十日=$1177.77 即係一日要教三個鐘,上三堂
仲未計燈油火立,折舊果d ,即係一日要上4個鐘先夠數,我未睇到d人上完你個射波堂會返黎再玩既原因,當你每一個學生上4堂,即係你一日做一個學生,即係一年你要有365個學生先夠數,nike league一年都係得5千幾人報名,咁你個market有幾大呢,你會唔搞到多人玩,同想玩個nike league?

我的諗法是這樣的，我唔會放下現在的教波工作唔做，我會在晚上或其它時間做私人的籃球訓練，但正如你所講，我並不可能即時就搵夠生意，但係亦都有好多幾它方法。何如我可以收每人$50一小時，4人成行，總收入一樣係$400./hr，但係一個人的練習時間會少左。反正平時都係十二人一齊練波。咁會唔會易受落d呢﹖我也可以收400/2 hr ，二人成行，咁樣又點呢﹖有 Partner 有得鬥波，不過我就要做到晚上十二時，做多幾個鐘。

我也可以聯同一些社工機構做 midnight basketball ，或者讓那些返工到十時先食完飯，街場都冇燈的行政人員同我一齊打下波﹖

例如我可以開small group 訓練，一個學生收100元，收到十個學生就會有1000.- 一小時。暑假可能會多d生意，晚上或者落雨生意應會多d，我仲可以叫阿媽幫我做 reception 開場俾那些現時的學生收 $50 一小時，最多3個人一齊練。

我只是知道如果我唔開始做，我就永遠都唔會做，我做左，失敗左，我學左野，交左學費，可能有人會覺得浪費，但我相信我屆时我對個人技術動作的籃球教練經驗，會比全香港甚至全亞洲的教練都好。

8)你係要教好d學生,定係想要自己起過c sir籃球場,你既投資咁大,如果失敗你既屋企人點呢?

你呢點好重要，所以我已經同老婆講左我會做2年，如果唔得我就放棄。如果宜家我繼續教波，但係又沒有進步，我唔能夠接受自己。或者2年後你會見到我做一個營舍的管理人員，賺月薪1萬5千，然後絕跡籃球界，回家揍女睇nba，那时候你再見不到一位有熱誠和勇氣的教練，這樣你會否覺得 c sir 才是聰明人，才是負任人的人﹖

你都曾經是一位學生，媽媽俾仔女去讀書，其實係俾緊機會子女去成長，唔係一種投資。若是投資我相信這是最不科學的，因為香港有多少人讀書會好﹖結果賺到 ﹖

如果我失敗﹖那要看什麼叫做失敗了。

耶穌基督死左，係咪叫失敗呢﹖
緬甸的僧人俾人殺哂，軍政府仍然當權，係咪失敗呢﹖
6 4死的中國學生，是不是失敗呢﹖
司徒華唔怕坐監而搞民間電台，你覺得他是不是傻呢﹖

如果我賺唔到錢，用了兩年的時間就做唔住，我相信仍然有許多學生會因為我而有成長，因為見到我不屈不撓，而會重新黎過，我相信我的失敗，或許會成為其它人的激勵，教我們不要害怕困難，教我們相信勇氣，面對社會上無限的困難。

如果我的失敗可以讓一些人明白籃球如何可以打得好，明白一個人自己去練係最重要。如果政府因為我的失敗，也聽到你的意見，讓將來香港出現有一個半場大小的籃球訓練場，有專業的器材，是不是都幾好呢﹖

9)明知唔得都要去試,點解唔一步步黎呢, 我想打波我都有dream,但係我會一步一步黎law,唔會不設實際,唔通我想打甲一,我買晒8隊波,跟住安排到自己贏晒咁,等d人睇我表現咩,d人d掌聲咪係比我law.....

多謝你真誠的關心，其實我仲未租場地，我就係做緊你講的，一步一步來。現在我出了一些廣告，在自己的大廈貼街召，我遲些會派傳單，睇下有沒有反應，如果真係影都冇，我都會考慮退出。

但係如果能夠用70萬去買一個理想實現，會唔會係太奢侈呢﹖如果今日李嘉誠買一架70萬的 Mercedes Benz ，你會唔會覺得他浪費呢﹖

好多人都有70萬，他們買靚樓靚車自己用，你不會出聲吧，但一個窮教練想去做一些東西，為的是教得更好，為別人犧牲，這卻是不設實際嗎﹖

10)如果你覺得個籃球世界果套係咁不如意既,你自己都唔肯慢慢咁改變佢,而去整一個籃球場去行自己果套既,而去避個問題既,咁你不如去自焚,or去絕食,表示對籃總既不滿,仲有意義過你搞籃球場啦,咁都叫死得有d意義,你咁樣搞衰左,d人都係話你抵死

為什麼你認為絕食會死得有d意義呢﹖如果我能夠有多些學生，教多一個人不要怕困難，嘗試去改變世界，不是更有意義嗎﹖ 其實我唔係幾覺得要同籃總鬥，因為他們的受眾是小數，那些喜歡打籃球，但從不入到精英或校隊的人才是大多數呀。不過香港的體育制度是精英制，沒有人會可憐那些打得不好的人，沒有人會幫他們。

世界的確有許多唔如意的事，去遊行示威是一種方法，但若能做一些正面積極的事，我相信更好。我相信年輕人是可改變的，只要今天我多一位像你這樣的學生，願意講出自己的睇法，也有一位"老餅"，願意和你討論，或許十數年後香港的籃球文化就會改變，或許社會許多不公義和不公平的事都有人會出聲。

最後衷心想向你講一句多謝，因為你說的問題很有 point，我會認真諗諗。

你是一個很聰明的人，因為你思考問題很實際，但除了告訴我行唔通，你何以像一些朋友給我一些實際幫到我的建議嗎﹖例如介紹學生給我，建議我什麼價錢合理，如何可以增加我的客量等等。你的意見絕對是我需要的。如果你介紹朋友來，給你一個折，你會帶到朋友來一次嗎﹖什麼價錢合理呢﹖

最後很開心能夠曾經教過你，多謝你還記得我這個教練，給我寫這許多肺腑之言。我知你是為我好，如果可以，想邀請你入我的顧問團，你可以告訴我你是誰嗎﹖